Wednesday, March 11, 2015

ഒരു 'ഗോ ഗ്രീൻ' വീട്ടിലെ കഥ!


ശിവന്റെ വീട്ടുകാർ ജന്മനാ അതിഭയങ്കര 'ഗോഗ്രീൻ' പ്രവർത്തകരാണ്. സപ്പോട്ട, സീതപ്പഴം,പാഷൻഫ്രൂട്ട്, മാവുകൾ, പ്ലാവുകൾ, പുളികൾ, തെങ്ങുകൾ, വാഴകൾ, മുളകുകൾ എന്നിങ്ങനെ ആകെ മൊത്തം പച്ച. ഇതിലേയ്ക്ക് എന്റെ രംഗപ്രവേശം എന്നുവച്ചാൽ വന്നുകയറിയത് അതായതു വലതുകാൽ വച്ചത്, ഒരു സന്ധ്യയ്ക്കാരുന്നു. സോ ചുറ്റുമുള്ളതൊന്നും കാണാൻ പറ്റിയില്ല. അല്ലേലും ആദ്യ ദിവസം തന്നെ ചുറ്റും തിരിഞ്ഞ് വായിനോക്കണത് മോശല്ലെ, മ്മ്ള് നോക്കണത് പ്രകൃതിയാണേലും ആളോളു കാണണത് മ്മ്‌ളെയല്ലെ!

പിറ്റേന്ന് നേരം വെളുത്തെണീറ്റ് വന്നതും കാണുന്നത് അനിയൻ മുറ്റമടിയ്ക്കണത്. "ശ്ശോ ആൺകുട്ടികളു മുറ്റമടിയ്ക്കുവോ, ങ്ങ് താ ഉണ്ണി ചേച്ചി ചെയ്തോളാം ഇതൊക്കെ" ഓടിച്ചെന്ന് ചൂലുവാങ്ങി.
വീട്ടിൽ ഒരിലയെടുത്ത് അങ്ങോട്ട് വയ്ക്കില്ല എന്ന നല്ലപേരുള്ള ഞാൻ മുറ്റം തൂക്കണു പ്ഫ്.. ആ ഈ പുത്തനച്ചി സ്റ്റൈൽ അങ്ങു മാറുമ്പോൾ ചൂലെടുത്ത് വല്ല അട്ടത്തും വയ്ക്കാം എന്നൊക്കെ ചിന്തിച്ച് സമാധാനിച്ച് തൂക്കാൻ തുടങ്ങി. ഭയങ്കര തൂക്കൽ, അതിനിടയിൽ അമ്മായിയമ്മ വന്ന് തടയാൻ ഒരു ശ്രമം നടത്തി. എവിടെ, നമ്മൾ വിടുവോ! "അവൾക്കിതൊക്കെ ഇഷ്ടാമ്മെ, ചെയ്തോട്ടെ" ശിവന്റെ സപ്പോർട്ടും. മറ്റ് പെണ്മണികളൊന്നും ഇല്ലാത്ത വീടായതിനാൽ അമ്മ വീണ്ടും അടുക്കളയിലേയ്ക്ക് പിൻവാങ്ങി. ഒരു മണിക്കൂർ തൂത്ത് നടുവൊടിഞ്ഞ് ഒരു വിധത്തിൽ മുറ്റത്തിന്റെ അങ്ങേയറ്റം വരെ എത്തിച്ചു. അവിടെ നിന്ന് നോക്കുമ്പോൾ ഞാനാ ഭീകര ദൃശ്യം കണ്ടു. ഈ മുറ്റത്ത് നിന്ന് കണക്റ്റ് ചെയ്ത് മറ്റൊരു മുറ്റം തെക്കോട്ട്. "എന്റെ ദൈവമേ എന്നേം അങ്ങ് തെക്കോട്ടെടുത്തേക്കണേന്ന്" അന്ന് തുടങ്ങിയ പ്രാർത്ഥനയാ. "എന്താടാ?" ശിവന്റെ ചോദ്യം. "ഈ മുറ്റോം തൂക്കണോ?" എന്റെ അതിദയനീയാവസ്ഥ മനസ്സിലാക്കാതെ അതോ മനസ്സിലാക്കീട്ടോ ആ കശ്മലൻ പറഞ്ഞു "പിന്നേ,ഇതൊക്കെ എന്നും തൂക്കണതാ, ഇനി പടിഞ്ഞാറു വശത്തും മുൻവശത്തെപ്പോലെ ഒരു മുറ്റമുണ്ട്, അതും തൂക്കണം". "ഹെന്റെ ദൈവങ്ങളേ" അന്തരാളങ്ങളിൽ നിന്നു വന്ന ഒരലർച്ച ഞാൻ തൊണ്ടയിൽ വച്ച് ബ്രേക്ക് ചെയ്ത് മാനം രക്ഷിച്ചു. "ഉണ്ണീ" , ആയുധം വച്ചുമാറാൻ ആണുങ്ങൾ മുറ്റമടിച്ചാലും കുഴപ്പമില്ല എന്നു ചേച്ചി പോളിസി മാറ്റിയ വിവരം അവനെ അറിയിക്കണ്ടെ. "എന്താ ചേച്ചീ, ഞാൻ കുളിക്കാൻ പോകുവാ" പറഞ്ഞതും അവൻ പാഞ്ഞുപോയ് കുളിമുറീൽ കേറി വാതിലടച്ചു. നാലേക്കർ മുറ്റം തൂക്കാൻ എന്റെ ജന്മം ദേ ഇനിയും ബാക്കി.

 പിന്നേം തൂക്കാൻ തുടങ്ങി, നോക്കുമ്പോൾ ഈ മുറ്റം ആദ്യത്തേതിലും മാരകമാണ്. മൊത്തം ഇലകൾ. അതും പുളിയില!!! പിന്നെ മാവില, പ്ലാവില, സീതാ ഫൽ കി(കോ, കെ, ഏതാന്ന് വച്ചാ സൗകര്യം പോലെ ചേർത്ത് വായിച്ചോ) ഇല എന്നിങ്ങനെ മുറ്റത്തൊരു സർവ്വമത സമ്മേളനം! തോന്നയ്ക്കൽ പഞ്ചായത്തിലെ ഓരോരോ പുളിയിലകളും ഞാൻ തൂത്തുകളഞ്ഞു അല്ല പെറുയ്ക്കിമാറ്റി. ഈ മരങ്ങൾക്കൊക്കെ ഇലപൊഴിയ്ക്കണന്ന് ഇത്ര നിർബന്ധാ? ഹോ!! അന്നാദ്യമായ് ഞാൻ മരങ്ങളെ പ്രാകിക്കൊന്നു.ദിതുപോലുള്ള അനേക പെണ്മണീകളുടെ കരച്ചിൽ കാരണമാവണം ഗ്രീനൊക്കെ കുറയണത്.

അങ്ങനെ മുറ്റം ഒരു പരുവവും ഞാൻ അതിദയനീയ പരുവവും ആയപ്പോൾ ശിവൻ മൊബൈലിൽ കുത്തിക്കൊണ്ട് വിശേഷം ചോദിയ്ക്കാൻ ഒരു വരവ്, "കഴിഞ്ഞോ?" "ഇല്ല, ആ പറമ്പും കൂടി തൂക്കാനുണ്ട്" പുതുപ്പെണ്ണിനത്യാവശ്യം വേണ്ട വിനയം, ബഹുമാനം എല്ലാം നാടുകടന്നു തുടങ്ങി.
"ആ എന്നാൽപ്പിന്നെ നീ അതൂടി കഴിഞ്ഞു വാ, ഞാൻ വല്ലോം കഴിയ്ക്കട്ടെ" എന്നുമ്പറഞ്ഞ് നടന്നുപോകുന്ന ആ കശ്മലനെയാണല്ലൊ ദൈവേ ഞാൻ പ്രേമിച്ച് കെട്ടിയത്.

അന്നു ഞാൻ ഇഡ്ഡലിം സാമ്പാറും കഴിച്ചപ്പോൾ മണി പത്ത്. അതിനിടയിൽ അമ്മായിയമ്മ ചോദിയ്ക്കണു, "എന്തിനാ മോളെ തെക്കുവശോം പടിഞ്ഞാറുമൊക്കെ തൂത്തെ, അത് സാധാരണ വൈകുന്നേരമാ തൂക്കുന്നെ". ദേഷ്യംകൊണ്ട് തുറിച്ച് നോക്കുമ്പോ ഒരാൾ ഒന്നുമറിയാത്തെ പോലെ നാലഞ്ച് ഇഡ്ഡലീനെ ഒരു ലിറ്റർ സാമ്പാറിൽ മുക്കിക്കൊന്ന് തട്ടിക്കൊണ്ടിരിയ്ക്കുന്നു.

ആ ദിവസത്തിന്റെ ക്ലൈമാക്സിൽ ഉച്ചച്ചൂടിൽ നായകൻ നായികയോട് കഞ്ഞിവെള്ളം ചോദിയ്ക്കുന്നു. പുതുമണവാട്ടിയായ നായിക കഞ്ഞിവെള്ളപ്പാത്രം തപ്പുന്നു. നോക്കുമ്പോൾ ടേബിളിലിരിയ്ക്കുന്നു ഒരു ചെരുവം കഞ്ഞിവെള്ളം. "ചൂടില്ല, ഇത് മതിയോ" ഞാൻ വിളിച്ചു ചോദിച്ചു. "ഓഹ് മതി, ചൂടൊന്നും വേണ്ട" ടീവീടെ മുന്നീന്ന് മറുപടി വന്നു. വല്യൊരു കുട്ടകം പോലുള്ള ഗ്ലാസ് തപ്പിയെടുത്ത് നിറച്ചൊഴിച്ചു കൊടുത്തു. കുടിച്ചതും മുഖം ചുളിയുന്നു. "അല്ലേലും എങ്ങനെ കുടിയ്ക്കണു ഈ കഞ്ഞിവെള്ളം" ജന്മനാ കഞ്ഞിവെള്ള വിരോധിയായ എന്റെ ചോദ്യം കേട്ടതും അങ്ങേരു വാശിതീർക്കും പോലെ അത് മുഴുവൻ വലിച്ചു കുടിച്ചു. കുറച്ച് കഴിഞ്ഞപ്പോൾ പറയണു, "എന്തോ പോലെ തോന്നണു, തലകറങ്ങുമ്പോലെ" . "ആ ഇനിയെത്ര കറങ്ങാനുള്ളതാ" എന്ന് ഒരു തമാശും പാസ്സാക്കി ഞാൻ അടുക്കളയിലെ അസിസ്റ്റന്റ് പണികളിലേയ്ക്ക് തിരിച്ചു പോയി. കുറച്ചു കഴിഞ്ഞപ്പോൾ അമ്മയുടെ ചോദ്യം "ആടിനു കൊടുക്കാൻ വച്ചിരുന്ന മരച്ചീനി വെള്ളമെവിടെ?" . "ഹെന്റെ മാതാവേ, എന്നെയങ്ങോട്ടെടുത്തോണെ" മരച്ചീനി വെള്ളം പോയവഴി മനസ്സിലാക്കിയ നായിക കുട്ടകം പോലുള്ള ഗ്ലാസും അതിൽ ബാക്കിയുള്ള തൊണ്ടിമുതലും വീണ്ടെടുക്കാൻ ശ്രമം തുടങ്ങി. "എന്താ അമ്മ ചോദിച്ചെ?" അപ്പുറത്ത്ന്ന് മകന്റെ ചോദ്യം? തകർന്നു, എല്ലാം തകർന്നു. മെല്ലെ ടീവിമുറിയിലേക്കെന്നൊത്തിനോക്കി, അമ്മയും മകനും ഭയങ്കര ഡിസ്കഷൻ. നായകൻ അമ്മയുടെ കൈയ്യിലേയ്ക്ക് ഗ്ലാസ് കൈമാറുന്നു, അമ്മ മണത്തും രുചിച്ചും സംഭവം ഐഡന്റിഫൈ ചെയ്യുന്നു. മകനോട് കൺഫേം ചെയ്യുന്നു. പിന്നെ നടന്നത്, "ധട്പുഠ്തോം" എന്നൊരു ശബ്ദത്തോടെ നായകൻ ബോധംകെട്ട് തറയിൽ. നായിക കല്യാണത്തിരക്കിൽ കാണാതെപോയ പേഴ്സ്തപ്പുന്നു, വണ്ടിക്കുലിയ്ക്കായ്.

2 comments:

  1. ഹ ഹ ഹ .നന്നായിട്ടുണ്ട്‌.നല്ല രസികൻ എഴുത്ത്‌.

    ReplyDelete